Prodhuesi kinez i automjeteve elektrike Nio ka zbuluar makinën e parë nga marka e re me çmim më të ulët Onvo, në një sfidë të drejtpërdrejtë ndaj makinës më të shitur të Tesla, raporton BBC. Me çmime që fillojnë nga 219,900 juanë (30,465 dollarë, 23,990 £), SUV L60 është më shumë se 10% më i lirë se EV më i popullarizuar në botë, Modeli Y i Tesla, i cili ka një çmim prej 249,900 juanë.
Ndërkohë kjo vjen në të njëjtën javë kur presidenti amerikan Joe Biden njoftoi se do të katërfishonte taksën e importit të makinave elektrike nga Kina. Ashtu si prodhuesit e tjerë të automjeteve elektrike, Tesla ka luftuar me rënien e shitjeve përballë konkurrencës së fortë nga markat kineze.
Automjeti u zbulua në Shangai nga shefi ekzekutiv i Nio, William Li, i cili tha se kompania synonte të rivalizonte Modelin Y të Tesla dhe Toyota RAV4. “Me zhvillimin e teknologjive dhe thellimin e të kuptuarit të njerëzve për automjetet inteligjente EV, sot është koha që ne të ripërcaktojmë standardet e reja për makinat familjare”, tha zoti Li.
Tashmë kompania ka filluar të marrë porosi për L60 dhe synon të fillojë dërgesat deri në shtator. Drejtuesit e Nio thanë se kanë plane për të lançuar një model të ri Onvo në vit, si pjesë e përpjekjeve për t’u zgjeruar në tregun e makinave familjare.
Marka mund të ndihmojë gjithashtu Nio-n të krijojë praninë e saj jashtë vendit të saj.
Megjithatë, ajo përballet me tarifa 100% në SHBA dhe një hetim të vazhdueshëm kundër subvencioneve të nisura nga Bashkimi Evropian për importet e automjeteve elektrike nga Kina.
Markat e makinave elektrike në mbarë botën po përballen me sfida të mëdha pasi përballen me shitje më të ngadalta dhe konkurrencë në rritje./tvklan.al
