Opozita e Kosovës nisi në orën 14:00 protestën e paralajmëruar kundër qeverisë, për marrëveshjen e firmosur në Bruksel me Serbinë për Asosiacionin e komunave serbe, si dhe demarkacionin me Malin e Zi.
Mijëra qytetarë me flamujt Kuq e Zi në duar janë mbledhur në sheshin “Skënderbeu”, në Prishtinë. Ish-lideri i Lëvizjes Vetëvendosjes, Albin Kurti, i pyetur pse në protestë nuk ka flamuj të Shtetit të Kosovës, tha se populli vendos se me çfarë flamujsh do të dalë në protestë.
Ai tha se ky është fillimi i fundit i qeverisë Thaçi-Mustafa dhe se “
sot ka filluar pranvera kosovare”.
Në protestë ishin të pranishëm figurat kryesore të partive opozitare të Kosovës, kryetari i Lëvizjes Vetëvendosje, Visar Ymeri, ai i Aleancës për Ardhmërinë e Kosovës, Ramush Haradinaj dhe kreu i Nisma-s, Fatmir Limaj.
Gjatë fjalës së tij, kreu i Vetëvendosjes, Ymeri kërkoi dorëheqjen e qeverisë duke i dhënë afat deri më datë 27 Shkurt. Sipas tij, nëse nuk shpallen zgjedhje të parakohëshme brenda kësaj periudhe, protestat nuk do të ndalen.
Ashtu siç ishin shprehur opozitarët kosovarë, protesta e ditës së sotme u mbyll paqësisht.
Pas përfundimit të protestës, kryeministri Isa Mustafa dhe zv/kryeministri Thaci thanë se nuk do të merren me afatet e opozitës, duke e ftuar atë të kthehet në Kuvend.
Policia e Kosovës tha se ishte angazhuar maksimalisht nën masa të rrepta për mbarëvajtjen e protestës, për të mos u përsëritur akte dhune. Pas përfundimit të saj shumë qytetarë nisën pastrimin e sheshit, mes të cilëve ishte edhe kreu i Aleancës për Ardhmërinë e Kosovës, Ramush Haradinaj.
Tv Klan