Avokati i ish-ministrit të Brendshëm Saimir Tahiri, Maks Haxhia, ka zhvilluar mbrëmjen e sotme një lidhje telefonike me emisionin “Opinion” në Tv Klan, ku u është përgjigjur pyetjeve nga paneli i gazetarëve.
Ai tha se avokatët e Tahirit në Itali, nuk janë njoftuar zyrtarisht se ka një procedim penal ndaj tij.
Blendi Fevziu: A ka procedim penal ndaj Tahirit në Katania?
Maks Haxhia: Kur ka ardhur grupi i prokurorëve nga Italia, ka sjellë të gjithë materialin dhe nuk figuron emri i Saimir Tahirit si person në proces penal.
Blendi Fevziu: Po a ka procedim penal ndaj tij?
Maks Haxhia: Ne zyrtarisht nuk kemi njoftim zyrtar se ndaj z. Saimir Tahiri ka procedim penal. Avokatët e z. Tahiri, kolegët tanë në Itali, janë kontaktuat nga Tahiri pikërisht për të ndjekur nëse do të kishte dhe në vazhdimësi ecurinë e procesit penal. Dhe ka qenë z. Tahiri, ai që ka kërkuar pikërisht nëpërmjet avokatëve që të sqarohet… për t’u investiguar nga autoritetet italiane.
/tvklan.al
