Autoriteti Rrugor Shqiptar i ka hequr të drejtën e vazhdimit të punimeve për by passin e Fierit dhe të Vlorës kompanisë “Serenissima”. Televizioni Klan ka siguruar letrën që drejtori i përgjithshëm i rrugëve i ka nisur krerëve të shoqërisë, ku i shpjegon arsyet e ndërprerjes së kontratës. Letra ka shkuar për dijeni edhe pranë ministrit të Transporteve, atij të Financave, zyrës së Bashkimit Europian dhe Bankës Europiane të Investimeve si kreditor i projekteve. Në mënyrë të paprecedentë kompania jo vetëm që nuk ka zbatuar afatet e kontratës, por vonesat në ndërtimin e rrugës janë të konsiderueshme.
“Nenet e kontratës shprehen qartë se punimet për rrugën tashmë duhet të ishin drejt përfundimit në masën 75%, ndërsa ju keni avanacuar me 12%, duke e bërë të pamundur afatin e mbarimit të saj që është 13 tetori i vitit 2017-të” thuhet në letër.
Në këtë shkresë, kompanisë i përmenden angazhimet e saj për të përfunduar rrugën në afat dhe mbledhjet e gjata me përfaqësues të shtetit, të cilat deri më sot nuk ndryshuan asgjë në fatin e dy By Pass-eve. “Edhe pse e keni shprehur vullnetin tuaj në letra, ju dështuat të përmbushni detyrimet në kontratë” thekson Autoriteti Rrugor.
Në fund kompanisë i lihet afat 14 ditë për të bërë mbylljen e dokumentacionit dhe të largimin nga kantieri. Në të gjithë këtë histori, nuk thuhet asnjë fjalë për nënkontraktorët e firmës Serenissima që punuan për llogari të saj në këto akse dhe pretendojnë se shoqëria italiane u ka 17 milion euro detyrime. Italianët kanë marrë për të përfunduar dy by-passet 80 milionë euro.
Tv Klan
