Nisja e punimeve të autostradës që do të lidhë Shqipërinë, Kosovën dhe Serbinë, po shihet edhe si mundësi për realizimin e një takimi të përbashkët të Qeverisë së Serbisë, asaj të Shqipërisë dhe përfaqësuesve të institucioneve të Kosovës.

Kjo çështje fillimisht është ngritur gjatë vizitës se nënpresidentit amerikan, Joe Biden në Beograd, ku kryeministri i Serbisë, Aleksandër Vuçiç i ka thënë nënpresidentit se brenda një muaji, “do ta mirëpresë kryeministrin e Shqipërisë, Edi Rama”, por edhe liderë të tjerë nga Kosova, pa saktësuar për kë bëhet fjalë.

Analistë në Beograd kanë thënë se ftesa për praninë e zyrtarëve nga Kosova krahas kryeministrit shqiptar, mund të bëhet me rastin e fillimit të punimeve në autostradën Nish-Tiranë, që kalon nëpër Kosovë.

Por, autoritetet zyrtare në Kosovë thonë se nuk kanë biseduar për një takim të mundshëm në këtë kohë, megjithëse kanë deklaruar se deri në periudhën e përfundimeve të punimeve të autostradës, Serbia do ta njohë pavarësinë e Kosovës dhe në një ceremoni të tillë, mund të jenë bashkë.

Ministri i Infrastrukturës në Qeverinë e Kosovës, Lutfi Zharku, për Radion Evropa e Lirë, ka thënë se ky është një projekt rajonal në kuadër të bashkëpunimit në Ballkan.

“Deri tash nuk është diskutuar kjo çështje, por besoj se do të jemi bashkë. Shpresojmë që deri në atë kohë, për dy-tre vjet, do të kemi një njohje formale nga Serbia”.

“Natyrisht, unë nuk mund të paragjykoj se kush do të jetë pas meje ministër i Infrastrukturës dhe cila qeveri do të jetë. Por,bashkëpunimi rajonal është kyç, apo element bazë për integrimet evropiane. Kështu që, Qeveria e Kosovës dhe populli, në përgjithësi, duhet të jetë i zotuar apo i përkushtuar për bashkëpunimet dhe integrimet rajonale”

, ka thënë Zharku.

Edhe përfaqësues të bizneseve në Kosovë, kanë pohuar se për një projekt të tillë rajonal, duhet të takohen krerët e institucioneve të të tri shteteve.

Agim Shahini, kryetar i Aleancës Kosovare të Biznesit, për Radion Evropa e Lirë ka thënë se takime të zyrtarëve të lartë të institucioneve të Kosovës dhe Serbisë, vazhdimisht po ndodhin në Bruksel.

Kështu që, sipas tij, një takim trepalësh duhet të ndodhë në fillim të punimeve të autostradës, pasi konsiderohet projekt i rëndësishëm dhe i financuar nga Bashkimi Evropian.

Shahini ka deklaruar se nëse Aleancës (Kosovare të Biznesit) i bëhet një ftesë e tillë, do të marrë pjesë, por, siç ka thënë ai, “në pajtim me autoritetet shtetërore”.

“Kjo do t’i jepte një autoritet më të madh, por njëherësh do të jetë një mundësi e pajtimeve shumë shekullore ndërmjet këtyre komuniteteve, të cilat padrejtësisht kanë qenë në konflikte dhe në lufta të ndryshme

”, është shprehur Shahini .

Ndryshe, ministri Zharku duke folur për përgatitjet rreth projektit, ka treguar se deri në muajin tetor të këtij viti, pritet të përfundojë studimi i fizibilitetit, dhe më pas, ministria do të marrë vendim për përcaktimin e trasesë, apo përcaktimin e kategorisë së rrugës e cila do të ndërtohet.

Autostrada në territorin e Kosovës, është vazhdimësi në Autostradën “Ibrahim Rugova”, që tashmë ka përfunduar deri në Besi, fshat ky që gjendet në magjistralen Prishtinë – Podujevë, kurse ekzistojnë edhe rreth 24 kilometra tjera deri në Merdarë.

“Sipas aktiviteteve që janë duke u ndërmarrë, shpresoj se në fund të vitit 2017 dhe në fillim të vitit 2018, do të nisë realizimi i projektit. Ky projekt do të duhej të financohej pjesërisht me grante nga Komisioni Evropian. Kurse, pjesa tjetër do të mbetet me financim nga ana e Bankës Evropiane për Rindërtim dhe Zhvillim dhe Bankës Investive Evropiane, dhe do të jetë hua e butë, sikurse që i kemi edhe për projekte tjera”

, ka shpjeguar Zharku.

Ndryshe, autostrada Durrës – Merdarë – Nish është projekt që përkrahet nga Bashkimi Evropian, si projekt i përbashkët i infrastrukturës rrugore dhe hekurudhore për Ballkanin Perëndimor.

Bashkimi Evropian, në mars të viti të kaluar, pas një konference ndërministrore të gjashtë vendeve Ballkanike, që është mbajtur në Prishtinë, ka premtuar se është i gatshëm të investojë deri në 1 miliard euro për projektet e përbashkëta të infrastrukturës rrugore dhe hekurudhore në Ballkanin Perëndimor./tvklan.al

Burimi REL