Në Maqedoni, Bashkimi Demokratik për Integrim ka vendosur t’ia japë nënshkrimet e deputetëve të tij liderit të Lidhjes Social Demokrate të Maqedonisë, Zoran Zaev, për marrjen e mandatit nga presidenti Gjorge Ivanov për formimin e qeverisë së re.

Vendimi është marrë pas një debati 10-orësh të kryesisë së BDI-së, parti e udhëhequr nga Ali Ahmeti, por ajo nuk ka vendosur nëse do të jetë edhe pjesë e koalicionit të LSDM-së.

“Dhënia e nënshkrimeve nuk nënkupton edhe pjesëmarrje në qeveri. Një nga opsionet është edhe mbetja në opozitë”, ka deklaruar zëdhënësi i BDI-së, Bujar Osmani.

Për t’u mandatuar nga presidenti Ivanov, lideri social-demokrat duhet të sigurojë edhe tre nënshkrimet e Aleancës Shqiptare, me të cilën po ashtu është në bisedime.

Ndërkohë, mbështetjen ai e ka marrë edhe nga Lëvizja Besa.

Kjo bën që Zaev të kërkojë mandatin nga Ivanov me 67 nënshkrime nga 61 sa janë të nevojshme.

Përafrimi ka ndodhur pasi Zaev ka pranuar platformën e partive shqiptare, përfshirë edhe draft-ligjin për përdorimin e gjuhës shqipe nëpër të gjitha institucionet.

Ndërkohë, VMRO DPMNE-ja, partia që ka mbajtur pushtetin në Maqedoni që disa vite, ka ftuar të gjitha organet partiake nëpër qytete për mobilizim në mbrojtje të, siç thuhet, Kushtetutës dhe karakterit unitar të shtetit.

Në shumë qytete ka pasur tubime, ku ithtarë të partisë së Nikolla Gruevskit kanë kundërshtuar ashpër marrëveshjen mes LSDM-së dhe BDI-së lidhur me draft-ligjin për gjuhën shqipe./REL