Banka Evropiane për Rindërtim dhe Zhvillim e rendit Shqipërinë në vendin e parë për reformat strukturore të kryera gjatë këtij viti.
Në Raportin e Tranzicionit për vitin 2014 thuhet se vendi ynë ka marrë vlerësim pozitiv në teknologjinë e informacionit, agrobiznes, industri, pasuri të patundshme në energjinë e qëndrueshme, transportin urban dhe sistemin bankar.
Treguesit e vlerësimit të BERZH shkojnë nga 1 deri 4 +. Vlerësimi 1 përfaqëson ndryshim pak ose aspak në krahasim me një ekonomi të ngurtë e centralizuar dhe 4+ përfaqëson standardet e një ekonomie të tregut.
Sipas raportit të BERZH më dobët paraqitet reforma në sektorë të tillë hekurudha, tregu i sigurimeve dhe tregjet e kapitalit.
Sa i përket vendeve të tjera të Rajonit, si Maqedonia, Serbia, Mali i Zi, Kosova, Bullgaria dhe Rumania raporti thotë se paraqiten shumë më dobët se Shqipëria.
Sipas Bankës Evropiane për Rindërtim dhe Zhvillim vitet e fundit kanë qenë të vështira për tregjet e energjisë në rajon.
Disa vende i kanë shpallur reformat në këtë sektor, por progresi me zbatimi ka qenë i ngadaltë.
Janë vënë re zhvillime pozitive përsa i përket infrastrukturës. Në fushën e kreditimit, Berzh thotë se hendeku është zgjeruar pothuajse në të gjitha vendet.
Kjo është nxitur nga kreditimi i pakët për shkak të gjendjes së dobët ta bankave të cilat po vuajnë në bilancet e tyre kreditë me probleme.
Lajmin për renditjen e Shqipërisë në vendin e parë për reformat strukturore të kryera gjatë këtij viti, e ka ndarë në rrjetet sociale edhe Kryeministri Edi Rama.
Tv Klan