Në një kohë kur fotografia digjitale është dominuese, profesionistët janë ata që e ruajnë artin e të bërit fotografi me film. Roland Serani, shqiptari i diplomuar në Londër, thotë se shkrepjet me film janë art i gjallë.
Për këtë arsye Roland Serani vazhdon t’i qëndrojë besnik shkrepjeve me film. Kjo edhe pasi festivalet apo ekspozitat e rëndësishme që zhvillohen në Evropë e Shtetet e Bashkuara, ku Rolandi është pjesëmarrës, kanë si kusht të fotografuarin me film.
“Filmi të mobilizon që t’i përgatitësh të gjitha gjërat në perfeksion. Kamera qe unë përdor është medium-format, pra ka vetëm dhjete shkrepje, pra kujdesi është akoma më i madh. Një kujdes me kosto te konsiderueshme financiare”, thotë ai.
I diplomuar për fotografinë ne Universitetin e Westminister dhe me pas për atë bardhe e zi në shkollën “Salvador Dali”, në Britaninë e Madhe ku edhe jeton prej më shumë se 20 vitesh si fotograf dhe si përkthyes i licensuar për çështje ligjore nga gjuha shqipe, Roland Serani, e vlerëson ecurinë e fotografisë shqiptare. Ai është i mendimit se Tirana e meriton një galeri fotografie, si çdo kryeqytet tjetër i Europës.
Enkelejda Mema/Tv Klan
