E drejta e votimit është një prej të drejtave elementare për këdo dhe kjo garantohet edhe me kushtetutë. Por në Gjermani ka rreth 85.000 persona me aftësi të kufizuara që nuk kanë të drejtë vote.
29-vjeçari ka kriteret e veta për të vlerësuar kandidatët dhe ai nuk gjykon vetëm nga pamja por dhe nga programet e partive të tyre. Megjithatë meqënëse Juliani është me sindromën down dhe ligjërisht për të gjitha çështjet nën kujdestarinë e prindërve, ai është i përjashtuar nga zgjedhjet për Bundestagun.
Ai nuk është dakord me këtë dhe prandaj do t’u thotë politikanëve në zonën e tij elektorale në Viersen mendimin e tij. Për këtë ai ka ftuar në shtëpinë e tij deputetin e CDU-së, Uwe Schummer, që kandidon për Bundestagun. Juliani dhe i ati mendojnë se përjashtimi nga e drejta e votës është i padrejtë.
Julian Peters përpara pllakatës zgjedhore me Christian Lindner, kryetar i Partisë Liberale FDP
Babai i Julianit, Ludger Peters nuk e pranon që i biri të përjashtohet nga e drejta e votës. Ai vërtet ka nevojë për mbështetje për disa gjëra, por pse nuk lejohet të votojë. Vota është e drejtë themelore e paprekshme dhe në shumicën e vendeve të BE-së e vetkuptueshme. Pse jo në Gjermani?
Vota e drejtë themelore e paprekshme
Koalicioni i madh nuk arriti të binte dakord për këtë, sepse kundërshtaret mendojnë se njerëzit me aftësi të kufizuara mund të ndikohen më lehtë dhe nuk janë në gjendje të informohen me themel. Babai i Julianit medon se këto janë paragjykime. “Ai informohet vetë dhe sheh çdo mbrëmje emisionin qendror të lajmeve. Kur vjen ora 8 na kujton madje edhe ne. Atij i pëlqejnë komeditë politike në TV dhe i sheh me shumë dëshirë. Unë nuk e di nëse i kupton apo jo të gjitha, por nuk është e drejta ime që ta marr në pyetje për këtë.” – thotë babai i Julianit, Ludger Peters.
Shumë familje, si familja Peters, kanë ngritur padi pranë Gjykatës Kushtetuese për të fituar të drejtën e votës për personat me aftësi të kufizuara, sepse politika nuk po merr dot vendim për këtë çështje./DW