14 kilogramë heroinë me vlerë mbi 2 milionë dollarë janë sekuestruar nga policia zvicerane, falë një hetimi të përbashkët me autoritetet gjermane. Në pranga përfunduan 3 persona, 1 shqiptar dhe 2 turq.
Autoritetet zvicerane sqaruan këtë të hënë se droga u sekuestrua në qytetin verilindor të Kreuzlingen, kantoni i Thurgau, që ndodhet në afërsi të Liqenit Konstancë, në kufi me Gjermaninë.
Gjatë një operacioni më të hershëm të zhvilluar në Nëntor, autoritetet kufitare sekuestruan 4 kilogramë heroinë në një makinë në pronësi të një 42-vjeçari turk nga Gjermania.
Në hetimin që pasoi mes autoriteteve policore zvicerane dhe atyre të Këlnit në Gjermani, në fund të Prillit u arrestua e një 48-vjeçar shqiptar dhe një tjetër turk, 43-vjeç, i cili kishte në pronësi një makinë në Zvicër.
Hetuesit gjetën 10 kilogramë heroinë brenda automjetit të tij, sasi e cila u sekuestrua.
Sipas mediave zvicerane, dy turqit janë pjesë e një rrjeti ndërkombëtar të trafikut të drogës, ndërsa për shqiptarin nuk jepen detaje të tjera.
/tvklan.al
