Një tjetër vrasje tronditi mbrëmjen e së martës qytetin e Vlorës. Fatjon Sinani, 35 – vjeç u ekzekutua me katër plumba në derë të shtëpisë.
Gjithçka ndodhi në sy të bashkëshortes së tij, e cila mësohet se ndodhet në gjendje të rëndë psikologjike.
Burimet bëjnë të ditur se çifti i bashkëshortëve nuk kishin fëmijë dhe jetonin në këtë shtëpi, në lagjen “Partizani”, me qira.
35–vjeçari ishte me origjinë nga Tropoja dhe njihej si njeri i qetë, e punëtor.
Dyshimet e para janë se shkak për ekzekutimin e tij të jetë një hasmëri e mundshme në vendlindje, por nuk përjashtohet edhe një konflikt i momentit mes viktimës dhe autorit.
Megjithatë do të jetë dëshmia e një prej vrasësve, që pritet të hedhë më shumë dritë rreth kësaj ngjarjeje të rëndë.
Fatjon Sinani u vra rreth orës 22:10, nga 42 – vjeçari Neritan Qejvanin, i cili u arrestua pak pas ngjarjes. Ai dyshohet se e kreu vrasjen në bashkëpunim me një tjetër person, aktualisht në kërkim nga autoritetet e Vlorës.
35 – vjeçari u qëllua katër herë dhe një prej plumbave e kapi në kokë./tvklan.al
