Kryetari i ri i Parlamentit të Maqedonisë, Talat Xhaferri deklaroi sot se përgjegjësia kryesore për atë që ndodhi të enjten në Parlamentin e Maqedonisë është e Nikola Gruevskit dhe retorikës së partisë së tij VMRO-DPMNE.
Në një intervistë për
Info Magazine
të Klan Kosovës, Xhaferri tha se për momentin nuk janë ende kushtet për zhvillimin e detyrës së kryeparlamentarit, për shkak të shkatërrimeve që i kanë ndodhur parlamentit nga huliganët.
“Në bazë të fushatës që është bërë dhe në bazë të deklarimeve dhe qëndrimeve partiake nuk përjashtohet rroli i tyre (Gruevskit dhe partisë së tij) në nxitje të kësaj atmosfere dhe normal që institucionet ekzekutive në qeverinë teknike ende janë në duart e tyre, për këtë kanë përgjegjësi për eskalimin e situatës
”, deklaroi Xhaferi, duke shtuar se përgjegjës është edhe
“presidenti Gjorge Ivanov me qëndrime anti-kushtetuese”.
“Kemi vendosur që të mos paraqitemi në Parlamentin dhe s’ka pasur kushte teknike dhe hapësinore për t’u kryer detyra. Pajisje të caktuar kanë pësuar demolime dhe duhet të rikthehet rregulli e të mundësohet funksionimi normal i administratës”.
Xhaferri foli edhe për gjendjen shëndetësore të deputetit Ziadin Sela.
“Pas raporti të mjekëve gjendje e tij është stabël, jashtë rrezikut për jetën. Ai ende po trajtohet, por shpresoj se shumë shpejt do të kthehet në aktivitetin e tij në Parlament”.
/tvklan.al
