Të blesh online është një lehtësi e madhe sot, por po me kaq lehtësi edhe mund të të vjedhin. 

Dhjetëra shqiptarë kanë rënë pre e një mashtruesi ndërkombëtar, që me gjasë është një meksikan, i cili ofron makina në një kompani të tregtimit online. Por që pas pagesës, klientit nuk i përgjigjet më askush.

Dhjetëra qytetarë shqiptarë po bien pre e mashtrimeve nga kompani fantazmë, që ofrojnë shitjen e automjeteve online nga Shtetet e Bashkuara të Amerikës.

I tillë është dhe rasti i kompanisë

autobrandnet.com

, viktimë e së cilës kanë rënë shumë qytetarë, kryesisht nga Tirana dhe Durrësi, vetëm gjatë muajve të fundit Gusht – Shtator.

“Njerëzit hyjnë në website autobrandnet.com kërkojnë të blejnë një makinë, bëjnë pagesë bankare nëpërmjet dokumenteve dhe makina nuk ju vjen. Është një shtetas meksikan, që fshihet pas këtij website”.

Alban Kosova, ekspert teknologjie na shpjegon rastin e një qytetari nga Tirana, që në Gusht u mashtrua për blerjen e një mjeti

Volkswagen Passat

 të vitit 2012.

“Në rastin konkret ka bërë 4 200 dollarë parapagesë me bankë, çmimi real i makinës ishte diku tek 9 000 dollarë”.

Por si funksionon realisht skema e mashtrimit nëpërmjet vjedhjes së të dhënave dhe informacionit nga agjencitë serioze të shitjes së makinave.

“Marrim rastin e një makine të përdorur Porche të viti 2015, që tek autobrandnet.com shitet 24 900 dollarë, e njëjta makinë ndodhet tek website i besuar, me vlerë 92 mijë dollarë dhe është në ankand, për të cilën shumë persona mund të japin ofertë dhe nuk mund ta blejnë. Ndërsa tek autobrand, me foto të vjedhura të tregon se mund ta blesh direkt, ndërsa realisht mund ta blesh vetëm në ankand”.

Kosova tregon se kanë mundur të shpëtojnë nga mashtrimi disa klientë, të cilët pasi kishin bërë veprimet paraprake, janë paraqitur tek shoqëria e tij, për të siguruar transportin.

“Ne tek buytoamerica.com na kanë ardhur diku tek 20 telefonata të shpëtuara nga ne, që na kanë thën që kemi gjetur një makinë shumë të lirë tek ky site dhe ne I kemi larguar nga ky mashtrim.Ndërkohë na janë ofruar dhe shumë të tjerë për ndihmë që na kanë thënë që kemi berë pagesën e kaparit dhe makina nuk po na vjen

.”

Sipas tij, shqetësues është fakti që qytetarët, për arsye të ndryshme, nuk denoncojnë në polici raste të tilla mashtrimi, me shuma të mëdha monetare.

Burimi: KLAN PLUS

Gazetar: Spartak Koka