Për Partinë Demokratike, vrasja e ndodhur gjatë natës në Shëndëlli të Sarandës ka si motiv drogën.

Në dalje për mediat nga selia blu, Sekretari për Aksionin Qytetar, Ervin Salianji tha se viktima që u gjet i pajetë sot, është vëllai i administratorit të Kaçinarit, i emëruar nga kryetari i Edi Ramës në Bashkinë e Mirditës, i cili e kishte kthyer banesën në magazinë droge, ku policia gjeti 424 kilogram kanabis me destinacion Greqinë.

Sipas PD, droga kalonte në Greqi pikërisht nga fshati Shëndëlli në Sarandë, ku ka ndodhur vrasja.

Kjo është viktima e 6 e drogës, e këtyre muajve, theksoi në deklaratën e tij Salianji. Ai tha se këto janë pasojat dramatike të alternativës së Edi Ramës për shqiptarët, që është kanabisi.

Kanabisi, alternativa e Ramës për vendin, kanabis voice alternativa e Ramës për rininë. Edi Rama dhe Tahiri e tij e mohojnë dhe thonë se në Shqipëri ska drogë, por mediat më të rëndësishme të Europës raportojnë të alarmuara për kanabisin shqiptar, për përkeqësimin e situatës dhe për ngarkesat e përditshme që kalojnë kufirin. Kanabisi vjen nga malet edhe përmes lumit, kanabisi ka zënë toka, pyje, kodra, ka zënë shtëpi e magazina, kanabisi po vret në Sarandë, Dukagjin, Korçë, Tepelenë, Vlorë, Kolonjë, e prapë Edi Rama thotë se s’ka drogë në Shqipëri, dhe se degën e fundit e kapi ai në një studio televizive. Ky biznes kriminal me futjen masive, me shtrirjen masive, po sjell tension social, agresivitet tek të rinjtë, dhe pasiguri ekstreme. Edi Rama dhe karteli i tij po fitojnë miliona euro, mbi rrënimin e vendit, mbi rrënimin e shoqërisë. Kjo është një e keqe me të cilën shqiptarët s’mund të pajtohen. Është koha për një reflektim të thellë, për reagim popullor për ta ndalur rënien e Shqipërisë në këtë greminë. Shqipëria më mirë pa Edi Ramën”,

 e përfundoi deklaratën e tij Salianji./tvklan.al