Shkarkimi i krerëve të policisë së qarkut të Elbasanit është përshëndetur nga kryeministri Rama, i cili shprehet se kush është i përfshirë me krimin e organizuar nuk mund të mbajnë uniformën blu të Policisë së Shtetit.
“Përshëndes shkarkimin e gjithë zinxhirit të komandës policore në Elbasan. Kush është përzier me çorbën e krimit, po edhe kush s’ka kurajo të përballet sy për sy e dhëmb për dhëmb me të, s’ka vend nën uniformën e dëshmorëve të Policisë së Shtetit”.
Por në një postim në rrjetet sociale ai sulmon të gjithë ata që kanë baltosur Policinë e Shtetit pas operacionit në Babicë të Vlorë ku kapen 4.5 ton kanabis duke i përkufizuar si fronti i çorbës seë vjetër.
“E turpshme përpjekja e Frontit të Çorbës së Vjetër për të baltosur Policinë e Shtetit për operacionin e suksesshëm mbrëmë në Vlorë, si pjesë e luftës ndaj rrjetit kriminal të heronjve të kazanit politik e mediatik të 48 orëve të fundit Policia e Shtetit po bën të gjithë gjërat e duhura dhe çdo drejtues e punonjës policie, duhet të vazhdojë të bëjë përditë këtë që po bën qysh prej nisjes së kësaj faze të re të luftës me krimin, pas pastrimit të Shqipërisë nga kanabisi”.
Postimin Rama e mbyll me premtimin se jo vetëm lufta kundër rrjeteve kriminale, por dhe kundër korrupsionit atë që askush s’ka guxuar as ta mendojë.
“Me mandatin e 25 qershorit, ne do t’i bëjmë jo vetëm rrjeteve kriminale, po edhe korrupsionit në tërësi, atë që asnjë nga këta që hidhen sot përpjetë në kazanin e politikës e të medias, s’ka guxuar as ta mendojë, në çerekshekulli rrumpallë e bashkëjetesë harmonike të pushtetit me llumin, ku ky vend mbeti pa shtet, pa ligj, pa drejtës. Këtu jemi dhe do të shohim. Ditë për ditë”.
Tv Klan