Nard Ndoka dhe Greta Koçi kanë rrëmbyer kupën në natën e parë të sezonit të tretë të “Dance With Me”. Me votat e publikut ata u shpallën fituesit e mbrëmjes.
Programi mjaft i dashur për publikun shqiptar u rikthye këtë të hënë me plot surpriza në Televizionin Klan, nën moderimin e Alketa Vejsiut.
12 personazhet e jetës publike u ngjitën në skenë, për të konkurruar mes njëri – tjetrit, jo me profesionin e tyre, por në gjininë e vallëzimit, atë profesionist.
Në skenën e “Dance With Me” prezantuan aftësitë e tyre në vallëzim, nën koreografitë e Albi Nakos, personazhe të teatrit, muzikës, spektaklit, por edhe politikbërës e shef kuzhine.
Çifti i parë që ka hapur mbrëmjen duke garuar me performancën e tyre të mrekullueshme kanë qenë Renato dhe Laura.
Jessy dhe Dj Vicky kanë sjellë performancën e dytë e cila është mirëpritur nga juria dhe publiku në sallë.
Fjolla Morina dhe Xum Allushi janë çifti që ka spikatur këtë mbrëmje, ku nuk kanë munguar batutat spontane që karakterizojnë Xumin.
Një performancë të mrekullueshme nën tingujt e “Pillowtalk” të Zayn Malik kanë sjellë Bora dhe Albani, duke e lënë pa fjalë jurinë.
Arnita dhe Besi kanë shkëlqyer me një Paso Doble.
“Besi ishte misi dhe Arnita Kurora,”
kështu e ka komentuar Albi Nako, koreografinë e tyre të realizuar mjaft mirë.
Nard Ndoka vjen në ekranin e Televizionit Klan, jo si politikan por tashmë si një balerin ‘profesionist.’
Nën koreografinë e Albi Nakos, politikani ka treguar se di të bëjë më tepër se sa vetëm politikë, di edhe të vallëzojë më së miri.
I shoqëruar nga partnerja e tij në garë Greta Koçi, ata kanë ardhur me një kërcim në tingujt e “L’emocione non ha voce”, të Adriano Celentano duke i kaluar pritshmëritë e jurisë.
Surprizë e kësaj nate ka qenë gjithashtu balerina me famë ndërkombëtare Klaudja Pepa, e cila e ka ndezur skenën e “Dance With Me”.
Plot sharm dhe stil Klaudja ka rrëmbyer zemrat e të gjithë të pranishmëve në sallë të cilët nuk i kanë kursyer duartrokitjet, por mbi të gjitha me performancën spektakolare ajo rrëmbeu edhe zemrën e bashkëshortit Albi Nako i cili nuk ka rezistuar pa i dhuruar një puthje.
Gjykimin e konkurrenteve , produksioni i Vera Grabockës ia besoi sërish treshes, Valbona Selimllarit, Albi Nakos dhe Robert Aliajt të cilët dhanë edhe vlerësimin e tyre për konkurrentët me anë të pikëve./klan.al