Ngjarja e rëndë e mbrëmjes së djeshme, në Kamëz, ku humbi jetën një polic dhe u plagosën dy të tjerë, është dënuar nga Kryetari i Partisë Demokratike, Lulzim Basha.
Në një deklaratë për mediat, Basha kërkon hetim të plotë. Ai thotë se vendi meriton rend e siguri.
Deklarata e plotë e Lulzim Bashës
Ngjarje jashtë mase tronditëse ajo mbrëmë në Kamëz, ku pas një aksidenti humbi jetën në detyrë, polici Ervin Haxhiaj. Dua të ngushëlloj nga zemra familjarët, të afërmit dhe kolegët e tij, dhe uroj shërim sa më të shpejtë për dy policët e tjerë, Besmir Voi dhe Neil Hoxha. Duke kërkuar hetim të plotë të rrethanave të ngjarjes, dua të shpreh shqetësimin e thellë për pasigurinë në rritje, në çdo drejtim në vendin tonë si pasojë e shthurjes totale të sigurisë dhe rendit. Nuk kalon një ditë e vetme pa një viktimë në rrugët tona, pa një përplasje me armë, apo një vrasje për shkak të drogës. Duhet një reflektim, duhet zgjidhje, vendi meriton rend dhe siguri./tvklan.al
