Për veprën penale të “Shkeljes së rregullave të qarkullimit rrugor ”, policia ka arrestuar Skënder Jonuzajn, shofer i autobusit që u përfshi nga flakët mesditën e së premtes në Krujë.
Në autobusin ku udhëtonin 30 besimtare të Kishës Ortodokse të “Shën Theodhorit” në Vlorë, humbi jetën 65-vjeçarja, Violeta Gjika dhe u plagosën rëndë 11 të tjerë.
Autobusi, që ishte në pronësi të Jonuzajt, shfaqi probleme teksa ngjitej për në Krujë, qytet i cili ishte pjesë e guidës turistikë të grupit prej 30 personash.
Burime nga grupi hetimor i thanë televizionit Klan se: “Zjarri mund të jetë shkaktuar nga probleme teknike e elektrike të motorit dhe rritjes së temperaturës”.
Zjarri është përhapur gradualisht në pjesën e motorit dhe përzierja e dioksidit të karbonit me ajrin e kondicionuar ka trullosur pasagjerët dhe shoferin, i cili nuk ka konstatuar rritjen e temperaturës në mjet.
Me hapjen e pjesës së motorit dhe kontaktit të menjëhershëm me oksigjenin zjarri u përhap me shpejtësi në përmasa të mëdha, duke sjellë më pas edhe lëndimin e pasagjerëve. Akti i ekspertimit teknik për udhëtimet ishte kryer në 24 dhjetor të vitit 2015, ndërsa kolaudimi i skadonte në qershor të këtij viti. / TV KLAN