Konflikti mes kushërinjve për tokën
Ky është 30-vjeçari Romeo Hasalla i cili mbeti i vrarë mëngjesin e së enjtes nga kushërinjtë e tij pas një konflikti pronësie në Garunjas të Lushnjes.
Ishte ora 6 e 30 e mëngjesit të së enjtes kur Romeo bashkë me dy vëllezërit dhe babin e tij kishin shkuar në tokat e tyre për të punuar me traktor. Aty kanë gjetur dy kushërinjtë e tyre, vëllezërit Kastriot dhe Afrim Hasalla, të cilët kishin vetëm dy ditë që ishin kthyer nga Italia.
Pasi kanë debatuar fillimisht në mënyrë verbale, situata ka dalë jashtë kontrollit dhe Kastriot Hasalla dyshohet se ka gjuajtur me çifte në drejtim të kushërinjve të tij. Për pasojë ka mbetur i vrarë në vend Romeo Hasalla, ndërsa është lënduar babai i tij Shaip Hasalla – 65 vjeç dhe dy vëllezërit Emiljano dhe Laert Hasalla 31 vjeç.
Ata kanë shkuar vetë me makinë në spitalin e Lushnjes për ndihme mjekësore dhe janë jashtë rrezikut për jetën. E tronditur, nëna e viktimës tregon se mosmarrëveshjet lindën për tokën.
“Ajo është tokë shtet, çunat e patën mbjell, ata thonë është toka ime, vajtën atje, nuk e di nona gjë më, për punë toke i raftë zjarri”.
Marjus dhe Afrim Hasalla janë arrestuar për vrasjen mbrëmjen e së enjtes, ndërsa në kërkim mbetet Kastriot Hasalla.
Tv Klan
