Sot bëhen tre vite nga tërmeti i 26 Nëntorit 2019. 51 persona humbën jetë si pasojë e këtij tërmeti të fortë. Mes tyre ishin edhe 8 fëmijë.

Dy nga zonat më të goditura ishin Durrësi dhe Thumana. Aty ishte edhe numri më i madh i personave që humbën jetën.

Të gjithë jemi njohur ato ditë me historinë e familjes Lala në Durrës, familjes Cara në Thumanë, familjes Çupi, historinë e Saimir Grekut, i cili mundi të dilte nga rrënojat pasi disa orësh, por për shkak të plagëve të rënda nuk ia doli të mbijetonte. Esiela Karanxha, 8 vjeç në Durrës, humbi jetën nën rrënojat, nën krahët e së ëmës, Dienës.

Tërmeti shkaktoi gjithashtu dëme shumë të mëdha materiale dhe shembjen e qindra banesave, duke lënë të pastrehë shumë banorë në disa zona të qytetit të Durrësit, Fushë-Krujës, Laçit, Lezhës e Tiranës, ndërkohë që ende sot banorët nuk janë sistemuar nëpër banesa.

3 vite nga tërmeti i 26 Nëntorit, Hohmann: BE do të vazhdojë të mbështesë Shqipërinë

Sot bëhen 3 vite nga tërmeti shkatërrues që goditi Shqipërinë dhe i mori jetën 51 personave e la me qindra e mijëra të tjerë pa banesa. Ambasadorja e BE-së Christiane Hohmann në një mesazh thotë se falë mbështetjes së BE-së tashmë kemi shkolla të reja të rindërtuara me standardet e BE-së dhe qendra historike të rikthyera në shkëlqimin e tyre të plotë. Ambasadorja shprehet se BE do të vazhdojë të mbështesë Shqipërinë, por edhe për ta ndihmuar që të ndërtojë të ardhmen në unionin europian.

“Në vitin 2019, Shqipëria u godit nga një tërmet shkatërrimtar. Ky ishte fillimi i një përpjekjeje të paprecedentë rindërtimi edhe nga ana e Bashkimit Europian. Sot, tre vjet më vonë shohim një numër shkollash dhe kopshtesh që janë rindërtuar, shohim vende historike që janë restauruar dhe po restaurohen tani. Me moton, “Të rindërtojmë më mirë”, tani kemi shkolla që përmbushin standardet europiane dhe vende historike që janë rindërtuar me gjithë shkëlqimin e tyre për t’u gëzuar nga brezat e ardhshëm. Ne do të vazhdojmë programet tona kryesore: “BE për kulturën” dhe “BE për shkollat” që të vazhdojmë rindërtimin. Tani dua të falenderoj popullin shqiptar për rezistencën dhe forcën në ndërtimin e Shqipërisë pas tërmetit shkatërrimtar. Jam këtu për t’ju bërë edhe një premtim. Bashkimi Europian është këtu për të vazhduar t’ju mbështesë, por edhe për t’ju ndihmuar të ndërtoni të adhmen tuaj në Bashkimin Europian”, u shpreh Hohman.

/tvklan.al