Tatimet: Nuk do të tolerohet askush që shkel ligjin
Një javë nga nisja e aksionit kundër informalitetit Drejtoria e Përgjithshme e Tatimeve ka dhënë shifrat e para. 267 biznese nga 1064 që janë kontrolluar janë ndëshkuar për parregullsi.
Delina Ibrahimaj, Drejtore e Përgjithshme e Tatimeve: 62 subjekte janë konstatuar të paregjistruara në organet tatimore, për të cilët është marrë masa e bllokimit deri në momentin e regjistrimit të tyre pranë QKB dhe organeve tatimore. 53 tatimpagues janë penalizuar pasi janë konstatuar me punonjës të padeklaruar.
106 tatimpagues të tjerë janë penalizuar për moslëshimin e kuponit tatimor në herën e parë ndërsa 12 tatimpaguesve u janë bllokuar ambientet për 30 ditë për moslëshim kuponi tatimor në verifikimin e dytë. Me gjoba janë ndëshkuar biznese pa kasë fiskale ose me pajisje që nuk ishin në funksion. Kreu i drejtorisë së Tatimeve Delina Ibrahimaj thotë se nuk do të tolerohet asnjë biznes që shkel ligjin.
“Asnjë sipërmarrës nuk mundet që të pasurohet duke shkelur ligjet në kurriz të të tjerëve. Nuk do të ketë më bare, lokale apo hotele që operojnë në treg pa NIPT-e. Nuk mund të ketë biznese që raportojnë xhiro sa një ambulant”.
Deri në fund të vitit, do te kontrollohen 6200 biznese. Këtë të hënë operacioni është shtrirë edhe në fushën e karburanteve ku janë rreth 420 subjekte të evidentuara me risk të cilat do të monitorohen dhe verifikohen nga strukturat përkatëse.
Masat e marra
62 subjekte të paregjistruar u bllokuan
53 tatimpagues te penalizuar me punonjës të padeklaruar
106 tatimpagues të penalizuar për moslëshimin e kuponit
12 tatimpagues bllokohen për 30 ditë (moslëshim kuponi)
12 tatimpagues pa kasë fiskale
12 tatimpagues me kasë jo në gjendje pune
20 tatimpagues me mallra pa dokumentacion tatimor
Tv Klan
