Një ngjarje e rëndë në kufijtë e një akti terrorist ka ndodhur në xhaminë e rrugës së Kavajës në Tiranë, ku një person ka sulmuar me thikë besimtarët brenda objektit të kultit.
Pesë besimtarë kanë mbetur të plagosur nga sulmi me thikë i Rudolf N. Nikollaj i datëlindjes 26.05.1987 nga Klosi, Burrel. 34-vjeçari goditi me mjetin prerës besimtarët duke plagosur 5 prej tyre.
Në vendngjarje shkuan menjëherë forcat e policisë, duke bërë neutralizimin dhe prangosjen e autorit të dyshuar.
Të plagosurit janë Donald Koçi 35 vjeç, Saba Peposhi 22 vjeç, Maringlen Konja 24 vjeç, Kleon Jupaj 26 vjeç dhe Amri Tolaj 23 vjeç. Ata janë dërguar në spital dhe ndodhen jashtë rrezikut për jetën.
Ndërsa autori Rudolf Nikollaj është dërguar në Policinë e Tiranës dhe po merret në pyetje.
Nga verifikimet rezulton se 34-vjeçari ka kryer një akt të tillë edhe pak kohë më parë. Në muajin Mars të këtij viti ka plagosur me thikë një 32-vjeçar pas një sherri mes tij dhe një personi tjetër në terminalin e autobusëve. Pas konfliktit fizik, Rudolf Nikollaj e goditi me thikë.
Imami Ahmed Kalaja: Shpresojmë që të mos ketë qenë ndonjë akt terrorist
Më tej Kalaja shpreson që kjo ngjarje të mos ketë qenë një sulm terrorist, por një akt i momentit nga personi që e ka kryer.
“Sot pasdreke nga ora 2 ka ndodhur një akt barbarie pranë xhamisë “Dine Hoxha”, një njeri i armatosurs ka goditur besimtarët brenda xhamisë, por ka goditur dhe njerëzit që kanë qenë në rrugë. Faleminderit Zotir që personi është arrestuar, situata është nën kontroll dhe nuk ka asnjë për t’u shqetësuar.
Shpresojmë që të mos ketë qenë ndonjë akt terrorist, por të ketë qenë një njeri me të meta mendore. Nuk ka asgjë për t’u shqetësuar, shpresoj që për punë orësh xhamia do të kthehet në gjendjen e saj të mëparshme. Zoti i largoftë nga ne njerëzit me probleme dhe duan të prishin harmoninë e këtij muaji të shenjtë. Janë plagosur disa vëllezër nga stafi i xhamisë, por dhe disa që kanë qenë duke adhuruar Zotit. Policia ka reaguar në kohë“, shprehet Imami Kalaja. /tvklan.al
Dalin pamjet, momenti kur autori i sulmit në xhami goditet nga qyterarët dhe arrestohet nga policia
Klan News ka publikuar pamjet e arrestimit të Rudolf Nikollajt, 34-vjeçarit që sulmoi me thikë besimtarët brenda xhamisë së rrugës së Kavajës në Tiranë, duke lënë të plagosur 5 prej tyre. Në këto pamje duket momenti pasi Rudolf Nikollaj është neutralizuar nga disa besimtarët e kalimtarë të rastit, të cilët e kanë shtrirë përtokë dhe godasin 34-vjeçarin. Ky është edhe shkaku përse autori ka dëmtime në fytyrë, si pasojë e goditjeve nga qytetarët pasi ai kishte kryer aktin e rëndë në kufijtë e një sulmi terrorist. Në atë moment ka mbërritur edhe policia, duke shoqëruar autorin e sulmit me thikë. Sipas informacioneve paraprake, 34-vjeçari sulmoi besimtarët brenda xhamisë teksa këta të fundit ishin duke u falur.
