Rënie të lehtë numri i të shtruarve në spital
Edhe pse ka një rënie të numrit të të infektuarve, numri i viktimave në Shqipëri për shkak të Covid-19 vijon të mbetet i lartë. Gjatë 24 orëve të fundit kanë humbur jetën 15 pacientë në spitalet Covid. Viktimat janë 4 qytetarë nga Tirana, 3 qytetarë nga Fieri, 2 qytetarë nga Korça, 2 qytetar nga Durrësi dhe nga 1 qytetar nga Shkodra, Kruja, Elbasani dhe 1 Skrapari, të moshave 34- 82 vjeç. Sipas bluzave të bardha, 34-vjeçari i cili ishte në intubim në spitalin Covid2 nuk kishte sëmundje të tjera bashkëshoqëruese .
Krahasuar me një ditë më parë ku u regjistruan 653 raste me Covid, të hënën nga 3001 testime të kryera, kanë rezultuar pozitivë 543 qytetarë. Shumica në tiranë me 188 raste, e ndjekur nga Shkodra me 38, Durrësi me 37, Fieri me 31 dhe Elbasani me 30 raste.
Aktualisht në 4 spitalet Covid në Tiranë dhe tre spitalet rajonale po trajtohen 485 pacientë, 32 në terapi intensive, nga të cilët 9 pacientë janë të intubuar.
Në 24 orët e fundit 578 qytetarë kanë fituar betejën me covid, duke e çuar numrin e të shëruarve në 81,061 që nga fillimi i epidemisë.
Tv Klan
