Tre persona kanë përfunduar në prangat e policisë së Korçës pasi në këmbim të parave do të ndihmonin 27 të huaj për të kaluar kufirin në mënyrë të paligjshme.
Të arrestuarit janë Leonard Jaçellari, 28 – vjeç, banues në fshatin Hudënisht të Pogradecit, Vasil Kuburja, 47 – vjeç, banues në Elbasan dhe Arsen Çekiçi, 44 – vjeç, banues në fshatin Buçimas, Pogradec.
Policia sqaron se këta tre persona u kapën në aksin rrugor Korçë – Pogradec pranë vendit të quajtur “Kryqëzimi i Vërdovës”, duke transportuar me automjetet e tyre 27 persona me kombësi siriane, irakene dhe sudaneze, të cilët vinin nga një kamp i qytetit të Selanikut të Greqisë dhe kishin kaluar ilegalisht kufirin e gjelbër drejt tokës shqiptare.
Të arrestuarit, sipas policisë, i kishin premtuar shtetasve të huaj se do t’i ndihmonin për të shkuar drejt vendeve të BE –së, duke kaluar nëpërmjet territorit shqiptar, kundrejt shumës prej 1200 euro për personat e rritur dhe 600 euro për fëmijët.
Pas përfundimit të veprimeve proceduriale si edhe intervistimit të tyre, 27 shtetasit e huaj, midis tyre 12 fëmijë të mitur, janë transportuar drejt Qendrës Kombëtare Pritëse për Azilkërkuesit, në Babrru.
Në cilësinë e provës materiale u sekuestruan 3 automjete, dy prej të cilave tip “Ford” me targa AA 370 IR dhe AA 622 MY, automjeti tip “Mercedes-Benz” me targa TR 3127 T si dhe 4 aparate celulare./tvklan.al
