9 të vdekur dhe 700 të helmuar nga kërpudhat

9 të vdekur dhe 700 të helmuar nga kërpudhat

22:06 20/05/2018

Më shumë se 700 persona janë helmuar pasi hëngrën kërpudha të egra helmuese në Iran. Sipas shërbimeve të emergjencës në këtë shtet, të paktën 9 persona kanë gjetur vdekjen, ndërsa me dhjetëra të tjerë mbeten në gjendje kritike.

"Të dhënat e fundit të emergjencës flasin për 721 persona të helmuar nga kërpudhat helmuese, nga të cilët 190 ndodhen në spital, 523 janë kthyer në shtëpi, ndërsa 9 persona kanë vdekur",

tha për agjencinë e lajmeve ISNA, një zëdhënës i shërbimit të emergjencës.

Po sipas këtij të fundit, të paktën 50 persona që u shtruan nëpër spitale të ndryshme të vendit janë në gjendje kritike dhe disa kanë nevojë për transplant mëlçie për të shpëtuar.

Ministria e Shëndetësisë tha se shkak për këtë gjendje ishte bërë një shi i dendur që kishte rënë nëpër rajonet malore të vendit dhe u bëri thirrje njerëzve që të evitojnë ngrënien e kërpudhave të egra dhe jo të zakonshme. Madje autoritetet bënë thirrje që as të mos i preknin ato për shkak se në lëkurën e disa prej tyre ka lëndë toksike.

/tvklan.al

Të ngjashme
Kolegji Profesional
AKSHI