Partia Demokratike i kërkon Prokurorit të Përgjithshëm dhe kryetarit të Parlamentit që të nisin procedurat për heqjen e imunitetit të deputetit të PDIU-së Aqif Rakipi.
Ky i fundit u përplasi për vdekje me makinë dy ditë më parë një këmbësor në autostradën Durrës-Tiranë.
Përmes një komunikate për mediat, selia blu deklaron se deputeti Rakipi u largua nga vendi i ngjarjes dhe kjo përbën vepër penale.
Deklarata e Partisë Demokratike:
Neni 273 i Kodit Penal, i cili është në fuqi edhe për miqtë e Edi Ramës, dikton se Aqif Rakipi mban përgjegjësi edhe për largim nga vendi i aksidentit, përgjegjësi që në vetvete denohet deri në 1 vit burgim.
Mbarë opinioni publik është i revoltuar se si gjithë shteti është vënë deri tani në shërbim të deputetit mik të Ramës, dhe në kurriz të viktimës. Gjithçka për ta paraqitur viktimën fajtor te aksidentit dhe fajtorin viktimë.
Largimi nga vendngjarja pas përplasjes për vdekje të Seit Sorrës, përveçse akt burracak i deputetit Rakipi, është edhe vepër e pastër penale që e rëndon pozitën e tij para ligjit.
Por miku i kryeministrit po përfiton nga Edi Rama i cili është në vijim të qëndrimeve të tij te njohura, pranë krimit e larg qytetarëve. Per më tepër, që deputeti Rakipi njihet si pikë kyçe e ndërlidhjes së Edi Ramës me trafiqet.
Partia Demokratike i kërkon Prokurorit të Pergjithshëm dhe kreut të Parlamentit të nisin urgjent procedurat e heqjes se imunitetit të deputetit Rakipi, dhe një hetim të plotë dhe te pandikuar te ngjarjes, në mënyrë që të ketë drejtesi për viktimën.
/tvklan.al
