Ambasada shqiptare në Itali është mbyllur për shkak të koronavirusit. Në një postim në rrjetet sociale njoftohet se një prej punonjësve ka rezultuar pozitiv me Covid-19.
Kështu që janë marrë masat që të dezinfektohen ambientet ndërkohë priten analizat e të gjithë punonjësve. Megjithatë ditën e nesërme ambasada jonë në Romë do t’i pezullojë shërbimet deri në një njoftim të dytë.
“Ambasada e Republikës së Shqipërisë në Romë njofton se nesër, datë 15 tetor 2020, Zyra Konsullore e saj pezullon përkohësisht të gjitha shërbimet. Duke kërkuar mirëkuptimin tuaj për këtë njoftim të menjëhershëm, i kushtëzuar nga identifikimi i një rasti pozitiv ndaj Covid-19, ju bëjmë me dije se po merren të gjitha masat për dezinfektimin e të gjitha mjediseve tona dhe mbetemi në pritje të rezultateve të testimeve të kryera për Covid-19, për të gjithë punonjësit e Ambasadës në Romë, në mënyrë që të rifillojmë shërbimin sa më parë dhe me masat e nevojshme të sigurisë. Brenda ditës së nesërme do të njoftoheni për rifillimin e shërbimeve”, thuhet në njoftimin e ambasadës./tvklan.al
