Çelësi i qelisë së burgut të ishullit Robben, ku mbahej i burgosur fituesi i çmimit Nobel për Paqen Nelson Mandela, do t’i kthehet Afrikës së Jugut pas anulimit të një ankandi në SHBA, njoftoi ministri i Kulturës së Afrikës së Jugut, i cili kishte kundërshtuar ankandin.
Sipas ministrit ky çelës i përket popullit të Afrikës së Jugut dhe simbolizon historinë e dhimbshme të vendit, dhe gjithashtu përfaqëson triumfin e shpirtit njerëzor mbi të keqen. Shtëpia e ankandeve Guernsey ka rënë dakord të dërgojë çelësin përsëri në Afrikën e Jugut dhe gjithashtu të ndalojë shitjen e sendeve të tjera që i përkisnin Mandelës.
Çelësi ishte nxjerrë në shitje nga Christo Brand, ish-gardiani i burgut të Mandelës në burgun famëkeq, ku të dy ishin bërë miq të mirë. Ankandi, i cili do të zhvillohej në Nju Jork më 28 Janar, ishte planifikuar të mblidhte fonde për një kopsht dhe muze përkujtimor mbi figurën e Mandelës. Mandela kaloi 27 vjet në burg për luftën e tij kundër aparteidit, 18 prej tyre në ishullin Robben, një ishull pranë Cape Town.
Klan News
