MSH: Gati plani edhe për spitalet rajonale

Në 5 muajt e fundit, situata e të sëmurëve me koronavirus është përkeqësuar dhe mjekët e infektivit po konstatojnë lodhjen në luftën me Covid. Shefja e infektivit në QSUT, Najada Çomo iu drejtua personalisht qytetarëve me një mesazh, ku vëren se lufta me Covid ka nisur që nga dimri dhe vazhdon edhe në muajt e verës.

Sa më pak ambientet publike, ku mblidhen shumë njerëz se janë vendi më i rrezikshëm për tu infektuar nga COVID-19. Virusi “është midis jush, e është dhe midis nesh”.

“Jemi në verë dhe prej pesë muajsh, fluksi i pacientëve ka ardhur duke u shtuar me të sëmurë rëndë e me humbje jete. Kam një apel që këto 5 muaj pune intensive që nga dimri deri në verë janë lodhje”.

Ministrja e shëndetësisë Ogerta Manstirliu tha se grumbullimet janë kthyer në vatra infeksioni. Mbi  1 mijë të prekur me Covid 19 po ndiqen nga mjekët e familjes.

“ Deri kur kjo pandemi të jetë mposhtur, kërkohet të heqim dorë nga grumbullimet dhe nga festat që shumë herë, dhe e kemi këtë të evidentuar, janë kthyer në vatra kryesore të përhapjes së infeksionit”.

Sipas ministren Manastrliu është bërë gati edhe menaxhimi i pandemisë për periudhën e vjeshtë-dimrit.

“Ne po përgatitemi për të përballuar situatën e vjeshtë-dimrit në disa drejtime. Nga krijimi i skuadrave të lëvizshme në Qendrën e Urgjencës Kombëtare tek skuadrat e dedikuara të mjekëve dhe infermierëve për spitalet Covid3 dhe Covid4, tek fuqizimi i kapaciteteve të spitaleve rajonale, nga rritja e kapaciteteve testuese tek vaksinimi i grupeve të riskuara”.

Që nga fillimi i pandemisë, situata është përkeqësuar ndjeshëm në muajin Korrik. 93 pacientë humbën jetën vetëm këtë muaj, në krahasim me 64 që ishin në total në 4 muajt e mëparshëm.

Tv Klan