Policia greke ka arrestuar një 47-vjeçar në Korfuz të akuzuar për përdhunime të shumta. I etiketuar nga shtypi grek si “monstra” i Korfuzit, ai u arrestua gjatë një aksioni të madh policor ditën e sotme, dhe lokalizimi i tij u bë i mundur edhe falë ndihmës së qenve të policisë.

Mediat lokale shkruajnë se në momentin e arrestimit, 47-vjeçari ka qenë i armatosur. Operacioni policor për arrestimin e tij nisi pas zhdukjes 2-ditore të një gruaje 34-vjeçare me origjinë shqiptare pak ditë më parë. Partneri i saj kishte ngritur alarmin për zhdukjen e shqiptares. Ajo u gjet nga forcat policore pas denoncimit të partnerit.

Në polici, 34-vjeçarja kishte deklaruar se ishte rrëmbyer nga 47-vjeçari, ishte mbajtur peng, kërcënuar dhe përdhunuar nga i ashtuquajturi “monstra” i Korfuzit. Gruaja shqiptare iu nënshtrua një ekzaminimi mjekësor dhe rezultoi se kishte shenja të abuzimit seksual.

Një media greke kontaktoi disa ditë më parë me 47-vjeçarin për ta pyetur lidhur me akuzat e bëra ndaj tij. Ai hodhi poshtë të gjitha pretendimet. 47-vjeçari është person me precedent penal dhe i akuzuar e dënuar edhe vite më parë për përdhunimin e disa turisteve nga Britania e Madhe.

Edhe pse u dënua në vitin 2012 me 53 vite vite burgim, shtypi grek shkruan se ai u la i lirë në Gusht të vitit 2019 në kuadër të ligjit “Paraskevopoulos”, një ligj i kontestuar shpeshherë në Greqi dhe që krijonte lehtësi për të dënuarit me aftësi të kufizuara, të mitur dhe shtetas të huaj. /tvklan.al