Një gjykatë në Kaliforni zbuloi se komediani Bill Cosby ishte përgjegjës për sulmin seksual të një gruaje në rezidencën Playboy në 1975 kur ajo ishte adoleshente. Gjykata i dha Judy Huth 500,000 Dollarë dëmshpërblim për shqetësimin emocional që ajo tha se pësoi vite më vonë, kur akuzat e shumta kundër Cosby nga gra të tjera ndihmuan të zgjojnë kujtimet e ndërveprimit të saj me komedianin.
Huth dëshmoi se komediani e ftoi atë dhe një mik në rezidencën e Playboy kur ajo ishte 16 vjeç dhe ai ishte 37 vjeç dhe e detyroi atë të kryente një akt seksual. Cosby, i cili nuk u paraqit personalisht në gjyq, mohoi akuzat. Cosby tha se nuk i kujtohej Huth. Por ai tha se incidenti nuk mund të kishte ndodhur sepse ai nuk do të kishte kontakte seksuale në atë kohë me dikë që ishte nën moshën 18 vjeç.
Gjyqi civil në Kaliforni u zhvillua 11 muaj pasi Cosby u lirua nga burgu kur gjykata më e lartë e Pensilvanisë hodhi poshtë dënimin e tij për sulm seksual në një çështje tjetër penale atje.
Cosby, 84 vjeç, është më i njohur për rolin e tij si bashkëshorti dhe babai i dashur në serialin komedi viteve 1980 “The Cosby Show”, duke i fituar pseudonimin “Babai i Amerikës”. Por reputacioni i tij miqësor ndaj familjes u thye pasi më shumë se 50 gra e akuzuan atë për sulme seksuale për gati pesë dekada.
Klan News
