Basha për burgosjen e 2 kryetarëve të PD: Vendim burracak

Basha për burgosjen e 2 kryetarëve të PD: Vendim burracak

19:30 16/06/2019

Kryetari i Partisë Demokratike, Lulzim Basha, doli në një konferencë për mediat pasi Gjykata e Elbasanit vendosi arrest me burg për dy zyrtarë të PD dhe dy aktivistë të saj, të cilët u arrestuan pas bllokimit të eskortës së kryeministrit Rama në Librazhd.

Basha e quajti vendimin e gjyqtarëve dhe prokurorëve si burracak. Gjithashtu më tej theksoi se ky vendim është represion i urdhëruar nga kryeministri për të persekutuar dhe trembur kundërshtarët politik.

“Prokuroria dhe gjykata e Elbasanit vendosi sot, të mbajë në burg Kryetarin e PD të Librazhdit zotin Bujar Vreto dhe kryetarin e PD të Përrenjasit zotin Arjan Karriqi, si dhe dy qytetarë të tjerë zotin Dashamir Boja dhe zotin Bujar Kllojku.

Krimi i tyre është se kanë protestuar në buzë të rrugës ku kaloi Edi Rama. Është vendim burracakësh i gjyqtarëve dhe prokurorëve të korruptuar të Edi Ramës. Është represion ndaj kundërshtarëve politikë i urdhëruar direkt nga Edi Rama. Qëllimi është vetëm një: persekutimi dhe trembja e kundërshtarëve politikë për të shuar protestën dhe përpjekjet kundër qeverisjes së kriminalizuar të Edi Ramës.

Duke shprehur solidaritetin tim për familjet e katër demokratëve të arrestuar që nuk do i kenë prindërit dhe bashkëshortët në shtëpi sot, dua ti drejtohem Edi Ramës dhe klanit të tij kriminal në qeveri: Opozita nuk frikësohet. Opozita nuk trembet. Opozita nuk tërhiqet. Unë, të gjithë demokratët në çdo cep të Shqipërisë dhe të gjithë qytetarët e bashkuar do ta luftojmë këtë qeveri kriminale derisa Edi Rama dhe kriminelët e tij të dalin para drejtësisë së vërtetë”, tha Basha.

Ndërkohë, kryedemokrati iu drejtua edhe prokurorëve dhe gjyqtarëve duke deklaruar se do ta shoqërojnë Ramën përpara drejtësisë dhe se ky veprim nuk do të harrohet apo tolerohet.

“Dua t’u drejtohem, gjithashtu, të gjithë policëve, prokurorëve dhe gjyqtarëve të Elbasanit, të cilët sot vendosën të mbajnë të burgosur politikë njerëz të pafajshëm, ndërkohë që kanë vite që tolerojnë dhe mbrojnë krimet e Qazim Sejdinit dhe të bandave të Elbasanit: Ju e dini shumë mirë se çfarë është ligji dhe drejtësia! Ju e dini shumë mirë se është kriminale që një prokuror dhe gjyqtar të braktisë ligjin dhe interesin publik për t’i shërbyer politikës dhe krimit. Ju e dini, edhe ne e dimë. Të gjithë njerëzit e dinë.

Edi Rama mund t’ju ketë premtuar se do t’jua falë korrupsionin dhe shkeljet ligjore. Edi Rama mund t’ju ketë premtuar se do ta kaloni vetingun. Kurse unë dua t’ju premtoj se shpejt do ta shoqëroni Edi Ramën përpara drejtësisë. Prokurori dhe gjykatësi i korruptuar është funksionari më i rrezikshëm në shoqëri. As njerëzit dhe as unë nuk do ta harrojnë dhe tolerojmë krimin dhe korrupsionin tuaj”, tha Basha./abcnews.al





Grupi
LAJMET

Të ngjashme




Grupi