“Ka braktisur personat me aftësi të kufizuara”
Pandemia ua ka vështirësuar edhe më tej gjendjen ekonomike, ndaj dhe në takimin që patën me Lulzim Bashën akuzuan qeverinë se i ka braktisur, duke mos mbajtur premtimet për personat me aftësi të kufizuara.
“Na premtoi edhe për 500 lekëshin, na premtoi edhe për 1 mijë lekëshin e asistencës sociale për të cilat tani në datë 22 Tetor kemi qenë edhe në Komisionet e Ekonomisë online edhe përsëri jemi zero”.
“Patëm një diskriminim në publik duke thënë që donatorët vazhdojnë dhe i mbështesin organizatat dhe kjo nuk ishte e vërtetë”.
I vetmi përgjegjës për keqmenaxhimin e situatës së pandemisë sipas Lulzim Bashës është Kryeministri Rama, të cili i kërkoi sërish të vërë në zbatim planin pesë pikësh të opozitës.
“Në veçanti rritjen e testimeve, rimbursimin e paketës së ilaçeve, forcimin e kapaciteteve spitalore, që do të thotë edhe hapjen e spitaleve rajonale, mos të përplasen të gjithë në Tiranë. Ndërkohë që po ndodh e gjithë kjo katastrofë shëndetësore dhe ekonomike. Situata për ju ka qenë një makth i vërtetë edhe para nisjes së pandemisë”, tha Basha.
Kreu i opozitës premtoi se pas ardhjes në pushtet të së djathtës, shqetësimet e ngritura nga shoqata e personave me aftësi të kufizuara do të marrin zgjidhje dhe abuzuesit e fondeve që duhet të shkonin për këtë kategori do të përballen me drejtësinë.
Tv Klan
