Kryetari i Partisë Demokratike është takuar me kryetaren e CDU-së, Annegret Kramp-Karrenbauer, e cila është njëkohësisht edhe ministre e Mbrojtjes e Gjermanisë. Në një deklaratë për mediat, Basha thotë se me Karrenbauer bisedoi mbi intensifikimin e bashkëpunimit mes Shqipërisë dhe Gjermanisë.
“I shpreha mirënjohjen për mbështetjen që CDU i jep Shqipërisë për hapjen e negociatave me BE. Partia Demokratike do të angazhohet për të përmbushur të gjithë hapat e përcaktuar në vendimin e Bundestagut, duke nisur me miratimin e reformës zgjedhore që i hap rrugë zgjedhjeve të lira dhe të ndershme”, thuhet në deklaratën e shpërndarë për mediat.
Gjithashtu kryedemokrati Basha ka falenderuar kryetaren e kristiandemokratëve gjermanë për ndihmën dhe përkrahjen e CDU me ekspertët e saj më të mirë për planin strategjik të PD-së.
“Zbatimi i saj do të ndihmojë për nxjerrjen e vendit nga kriza duke hapur vende pune me paga dinjitoze në veçanti për të rinjtë”.
“Sapo PD-se t’i besohet qeverisja e vendit, me ndihmën e CDU dhe kryetares Annegret Kramp Karrenbauer do të vëmë në jetë një plan strategjik kombëtar për investimet gjermane dhe të huaja me potencial të madh për zhvillim dhe për të hapur mijëra vende pune. Përparësia jonë është që të rinjtë shqiptarë të kenë të gjitha mundësitë dhe të zgjedhin të ndërtojnë te ardhmen në Shqipëri”, përfundon deklarata. /tvklan.al
