Kryetari i Partisë Demokratike, Lulzim Basha, u ka bërë thirrje qytetarëve që të tregohen sa më shumë bashkëpunues me stafet mjekësore.

Ky reagim i liderit të selisë blu vjen pasi një mjek i spitalit të Durrësit rezultoi pozitiv me COVID-19, pasi vizitoi të infektuarën me koronavirus në Durrës, e cila fatkeqësisht ndërroi jetë.

“Të tregojnë në mënyrë të detajuar shqetësimin e tyre, historikun e udhëtimeve apo kontaktin që mund të kenë pasur me persona të prekur nga COVID-19. Në këtë mënyrë do të ndihmoni veten dhe nuk do të rrezikoni shëndetin e mjekëve, të cilët janë mburoja jonë, mburoja e çdo qytetari në këtë situatë. Mos neglizhoni asnjë detaj! Thirrja ime është për të gjithë qytetarët: E di që shumë prej jush nuk janë mësuar të rrinë mbyllur apo kanë kushte jo të përshtatshme. Shumë të tjerë kanë nevojë të punojnë për të çuar bukën e përditshme në shtëpi, por asgjë nuk vlen më shumë sesa jeta. Me qëndrimin në shtëpi mbroni veten, familjen, miqtë dhe të afërmit. Nga sakrificat e sotme varet jeta, shëndeti, e sotmja dhe e nesërmja jonë. Mbi të gjitha, duke kontribuar në mospërhapjen e shpejtë të virusit, ne bëjmë pjesën tonë si qytetarë për ruajtjen e sistemit shëndetësor nga kolapsi. Sa më të pakujdesshëm sot, aq më shumë do të zgjasë kjo situatë, e cila ka pasoja të drejtpërdrejta në shëndetin dhe në ekonominë e secilit prej nesh. Kjo është një kohë për kujdes shëndetësor, por edhe për kujdes social për ata më të pamundurit”, shkruan Basha.

Kreu i demokratëve ripërsërit thirrjen për qeverinë që të të marrë masa për personelin shëndetësor parësor. Basha shton që duhen marrë masa për t’u mundësuar familjeve në nevojë dhe në pamundësi gjërat e domosdoshme për të kaluar krizën.

“Ata janë të ekspozuar ndaj personave mbartës potencialë të Covid 19, por që, për shkak të shenjave joshqetësuese, mund ta neglizhojnë këtë fakt e të drejtohen tek qendrat shëndetësore apo spitalet rajonale. Autoritetet duhet të pajisin të gjithë personelin e dedikuar për raste të tilla me veshjet dhe mjetet e posaçme mbrojtëse. I bëj thirrje qeverisë të marrë të gjitha masat për t’u mundësuar familjeve në nevojë dhe në pamundësi gjërat më të domosdoshme për të kaluar këtë krizë dhe për të ruajtur shëndetin duke mundësuar që asnjë familje mos të mbetet pa ushqim dhe mjete higjienike”, shkruan Basha.

Në fund, ai i lëshon një thirrje kompanive celulare që të sigurojnë akses pa pagesë në internet për fëmijët dhe studentët në mënyrë që në javët në vazhdim të zhvilljnë online mësimin.

“Ky kontribut për mësimin online të fëmijëve, do të ishte shumë i çmuar dhe i vlerësuar”, shkruan në përfundim kreu i demokratëve./tvklan.al