Veliaj: Nga Janari nisim studimet e thelluara për çdo pallat
Muzikë, ushqim i ngrohtë dhe festë. Kjo është panorama që të ofrohet në qendrat sociale ku Bashkia e Tiranës ka shtruar drekën e fundvitit për personat në nevojë.
“Ky ka qenë një vit shumë sfidues. Megjithatë, siç thonë gjyshet tona, qofshin të kaluara dhe 2019-ta i marrtë me vete. Di të them se njerëzit i njeh më mirë në vështirësi. Kur je mirë, të gjithë sillen mirë; kur ka vështirësi, aty kuptohet sa i fortë dhe reagues është shteti, bashkia, qyteti. Dua t’ju uroj shëndet dhe një 2020 sa më të suksesshëm”, tha Veliaj.
Veliaj u ndal tek ngjarja më e rëndë e këtij vit, tërmeti.
“Nga muaji janar do nisim ato që quhen studime të thelluara të çdo pallati. Në çdo pallat do të kalohet 3-4 ditë për t’u siguruar me inxhinierët që bëhet testi i betonit, testi i hekurit, i materialeve të përdorura. Një pjesë e pallateve mund të jenë të rikuperueshëm me pak përforcim. Në momentin që pallati shpallet i rekuperueshëm pas vlerësimit të thelluar, do të fillojmë investimin dhe përforcimin e tij”, tha Veliaj.
Sa i takon të gjitha familjeve që kanë banesa tërësisht të parikuperueshme ose kostoja e rikonstruksionit do të rezultojë tepër e lartë, Veliaj u shpreh se do tu jepet banesë e re në pallatet që do ndërtohen. Por, deri në zgjidhjen përfundimtare të çështjes së strehimit, këto familje do të përfitojnë bonusin e qirasë.
Tv Klan
