Premier Liga angleze starton me surprizë, Arsenal mundet nga debutuesit e Brentford
Dy nga kampionatet më të rëndësishme në Europë kanë startuar me rezultate jo të mira për klubet e mëdha.
Në Bundesliga, Julian Nagelsman, trajneri i ri i Bayern Munich e ka nisur me barazim sezonin e ri. Bavarezët në javën e parë të kampionatit kanë barazuar 1-1 në transfertë me Borussia Monchengladbach. Bayern ka pësuar gol që në minutën e 10-të, kur Plea i vetëm përballë Neuer nuk e pati të vështirë të kalonte në avantazh vendasit e Monchengladbach. Me kalimin e minutave, bavarezët provuan në të gjitha mënyrat të shënonin në portën kundërshtare, gjë që e arritën në fund të pjesës së parë me atë të goleadorit të tyre më të mirë, Lewandovswki, i cili shfrytëzoi një harkim të Kimmich. Pjesa e dytë prodhoi raste të shumta për Bayern, por që në fund u desh që të kënaqej me pikën e barazimit.
Nga ana tjetër Premier Liga angleze ka nisur me një surprizë të madhe, ku Arsenali është mundur në transfertë nga Brentford. Vendasit me entuziazmin e debutuesit kanë arritur fitoren e parë në historinë e klubit në Premier Ligë me rezultatin e pastër 2-0. “Topçinjtë” janë ndëshkuar nga gabimet në mbrojtje, ku vlen të theksohet se goli i dytë u pësua nga një top i hedhur nga rivënia anësore. Sulmi i Arsenal me mungesat e Aubameyang dhe Lacazette nuk kishte fuqinë e duhur dhe kështu londinezët e nisën sezonin me një rezultat zhgënjyes, ashtu siç mbyllën sezonin e vjetër.
Klan News
