Borrell: Rusia po ndjek qasje konfrontuese ndaj Europës
Marrëdhëniet e tensionuara midis Bashkimit Europian dhe Rusisë kryesojnë axhendën e takimit të ministrave të Jashtëm të bllokut në Bruksel.
Vazhdimisht Bashkimi Europian ka kërkuar lirimin e kritikut të Kremlinit Alexei Navalny, duke kërcënuar në të kundërt me sanksione të reja.
I ashpër në deklaratën e tij ishte Përfaqësuesi i Lartë i BE-së për Politikën e Jashtme, Josep Borrell.
“Është e qartë se Rusia po ndjek një qasje konfrontuese me Bashkimin Europian. Ka një refuzim të verbër për rastin e çështjes së zotit Navalny, refuzim për të zbatuar angazhimet ndërkombëtare, duke përfshirë edhe vendimin e Gjykatës Europiane të të Drejtave të Njeriut,” tha ai.
Rusia thotë se është e gatshme t’u përgjigjet sanksioneve të reja europiane me ndërprerjen e lidhjeve diplomatike.
Marrëdhëniet midis Brukselit dhe Moskës prekën fundin pas dëbimit të disa diplomatëve nga të dyja palët.
Ministri i Jashtëm rus Sergey Lavrove ndryshoi tonin e deklaratave pasi takoi homologun finlandez Pekka Haavisto dhe tha se Moska është e gatshme për t’i riparuar lidhjet dypalëshe.
Në axhendën e kryediplomatëve europianë është edhe shtypja e opozitës në Bjellorusi, gjendja e krijuar pas gushtit të shtetit në Mianmar, marrëveshja bërthamore e Iranit dhe gjendja në Etiopi.
Klan News
