Biden përmbys politikat e Trumpit për çështje të abortit



Biden përmbys politikat e Trumpit për çështje të abortit

09:25 29/01/2021

Presidenti amerikan, Joe Biden ka përmbysur një ndalesë të fondeve federale, që shkojnë për grupet ndërkombëtare të ndihmës, të cilat japin informacione për abortet.

Ai ka thënë se dhënia fund e të ashtuquajturës Politikë e Meksiko Sitit, kthen mbrapsht “sulmet” e ish-presidentit amerikan, Donald Trump ndaj “qasjes në kujdes të grave”.

Memorandumi urdhëron një rishikim të politikës së kohës së Trumpit, e cila bllokon fondet për klinikat amerikane, të cilat ofrojnë edhe referime për abort.

Biden të enjten ka nënshkruar edhe një dekret që zgjeron programin e sigurimit shëndetësor Obamacare.

“Nuk jam duke krijuar ligj të ri, apo aspekt të ri të ligjit”, ka thënë ai në Shtëpinë e Bardhë, duke iu përgjigjur kritikave se ai po udhëheq me urdhra ekzekutivë dhe jo me legjislacione përmes Kongresit.

“Nuk po bëjmë asgjë të re, vetëm po rikthejmë Aktin e Përballueshëm për Kujdes (Obamacare)… në mënyrën si ka qenë para se Trump të bëhej president”, ka shtuar ai.

Kjo qasje e miratuar fillimisht nga ish-presidenti republikan, Ronald Reagan më 1984, është rikthyer gjithmonë nga republikanët dhe është pezulluar nga demokratët.

Për dekada, Shtetet e Bashkuara kanë pamundësuar shpenzimin e parave në aborte jashtë shtetit, mirëpo Politika Meksiko Siti shkon një hap më tutje.

Ajo parandalon ndarjen e fondeve federale për organizatat që ofrojnë aborte, konsulta për aborte apo mbrojtje të të drejtave të abortit.

Programi është zgjeruar nga Trump, i cili ka ndaluar ndarjen e fondeve për organizatat joqeveritare që ofrojnë fonde për grupe të abortit.

Përmes një deklarate të lëshuar nga Shtëpia e Bardhë, Biden ka thënë se po merr vendime si president “për të mbështetur shëndetin riprodhues të grave dhe vajzave dhe të drejtat e tyre në SHBA dhe në nivel global”. /REL







Të ngjashme