Palët janë ndarë me nga 60 deputetë secila
Pas dështimit të votëbesimit të qeverisë në Maqedoninë e Veriut, as pushteti dhe as opozita nuk e kanë shumicën e nevojshme, as për të vazhduar përpara e as për të votuar për zgjedhje të reja. Asnjëra palë nuk i ka 61 deputetë.
Situata 60-60 ka hapur diskutime mes partive që do të shpiente në forcimin e shumicës aktuale, respektivisht formimin e një shumiceje të re. Gjatë ditës së sotme Radmilla Shekerinska nga LSDM tha se po zhvillohen bisedime për të siguruar shumicë parlamentare.
“Qytetarët e pritën këtë me lehtësim, tani presin prej nesh që ta konfirmojmë edhe me sigurimin e shumicës parlamentare, që do të garantojë Kuvend funksional dhe rrjedhje normale të procesit të reformave. Po zhvillohen bisedime, pres që kjo të përfundojë shpejt dhe me sukses, sepse na pret punë”.
Nga VMRO-DPMNE përsërisin se vendit i duhen zgjedhje të shpejta të parakohshme, Ata kërkojnë nga Zaev të japë menjëherë dorëheqje.
“Për këtë arsye, mashtruesi, gënjeshtari dhe Kryeministri në largim Zoran Zaev, duhet sa më shpejtë të japë dorëheqje dhe ta lirojë shtetin, t’i shpëtojë qytetarët dhe Republikën e Maqedonisë nga dështimi. Dorëheqje menjëherë, ndërsa përgjegjësi menjëherë më pas”.
Ndërsa edhe përskaj zërave në opinion se Alternativa do të mund t’i bashkangjitej shumicës aktuale LSDM-BDI, Sekretari për Marrëdhënie me Opinionin i Alternativës, Zeqirija Ibrahimi, nëpërmjet një postimi në Facebook, ka rikujtuar se BDI bën pjesë në shumicën me vetëm 60 deputetë.
“Këta që mendojnë se shumica bëhet “t’u pi duhon” a e dinë se Kuvendi me 60 deputetë nuk funksionon? Apo, mos kanë ndonjë zgjidhje “Euroatlantike” të “vetëkidnapimit” të ndonjë deputeti për ta shpëtuar “vendin” nga rreziqet ruso-kineze”.
Ashtu siç qëndrojnë numrat, aktualisht do të pengojnë miratimin e projekt-buxhetit për vitin e ardhshëm. Buxheti sot hyri në procedurë parlamentare, ndërsa do të duhet të votohet më së voni deri në fund të Dhjetorit.
Klan Maqedonia
