Nën masa të rrepta sigurie është zhvilluar seanca për caktimin e masës së sigurisë për 5 të arrestuarit e operacionit të policisë ne Nikël. Gjykata e Krujës ka qenë e rrethuar nga forca të shumta të policisë lokale dhe repartit të Forcave të Ndërhyrjes së Shpejtë.
Prokuroria e Krujës kërkoi burg për të ndaluarit për akuzat e armëmbajtes pa leje dhe pastrim parash. Gjatë operacionit të 4 ditëve më parë në Nikël, u sekeustruan dy pistoleta, armë të ftohta dhe shuma të konsiderueshme parash. Për prokurorinë, paratë dyshohet se janë produkt i aktiviteteve kriminale, kreysisht gjobëvënies.
Pasi dëgjoi pretendimet e palëve, Gjykata vendosi masën arrest me burg për Ylli Çangun, Marklen Hakën, Valter Bamin dhe Skënder Lezën. Ndërsa për 67-vjeçarin Lutfi Haka u caktua masa e sigurisë arrest shtëpie. Në përfundimin e seancës, avokati i Valter Bamit u shpreh se klienti nuk mund të mbahet në qeli për një shpatë, ndërsa e cilësoi aksionin e policisë si joligjor.
Mëngjesin e të mërkurës, reparti special RENEA i mbështetur nga policia lokale dhe FNSH mësynë në Nikël. Gjatë operacionit u sekuestruan dy pistoleta, 4 pushkë sportive, disa armë të ftohta dhe rreth 10 milionë Lekë. Fillimisht në policinë e Durrësit u shoqëruan 11 persona, 6 prej të cilëve u liruan. Midis të liruarve ishte edhe Durim Bami një emër i njohur për drejtësinë. Fshati Nikël pranë Krujës përmendet në raportet e policisë si një nga zonat ku qëndrojnë kontigjent kriminal me rrezikshmeri të lartë shoqërore.
Tv Klan
