35-vjeçari në gjykatë: Kisha frikë për fëmijët e mi, e bëra për t’i mbrojtur

Gjykata Penale e Tiranës ka caktuar masën e sigurisë arrest në burg 20 ditë për J. Zh që “burgosi” familjen e tij.

Prokuroria kërkoi që 35-vjeçari të qëndronte në qeli për 30 ditë deri në daljen e rezultateve të ekspertizës mjeko-ligjore që do të përcaktojë gjendjen e shëndetit mendor për J. Zh. Në seancë avokati ka kërkuar shtrim të përkohshëm në spital deri në rezultatet e akt-ekspertizës. Ndërsa J.Zh ka pretenduar se gjithçka e ka bërë për të mbrojtur fëmijët, pasi siç u shpreh, kishte frikë për ta.

35-vjeçari akuzohet për dhunë në familje dhe shkaktim të vetëvrasjes, pasi prej më shumë se 1 viti mbante mbyllur në banesë familjen.

J. Zh kishte përshtatur banesën e tij në një burg për familjarët e tij, mes të cilëve nënën e tij, gruan dhe dy fëmijët 3 dhe 9 vjeç të cilët ishin të monitoruar gjatë gjithë kohës me kamera sigurie.

Gruaja e 35-vjeçarit ka rrëfyer se prej 1 viti gjysmë asaj i është mohuar të dalë nga shtëpia dhe është dhunuar në mënyrë të vazhdueshme. Pavarësisht kësaj e reja rrëfen se nuk e ka kallëzuar në polici bashkëshortin e saj pasi e do atë.

Ndërsa nëna e 35-vjeçarit ka treguar përpara oficerëve të policisë se i biri prej 1 viti ka shfaqur shqetësime. Sipas saj, atij i dukej sikur dëgjon zhurma në muret e banesës. Ajo ka treguar se i ka kërkuar disa herë të mjekohet, por ai nuk ka pranuar.

/tvklan.al