Deputeti i Partisë Demokratike Enkelejd Alibeaj ka kërkuar që të hetohen deputetët e mazhorancës dhe të opozitës në lidhje me provat për dosjen Habilaj.
I ftuar në emisionin “Opinion” në Tv Klan, Alibeaj kërkoi që të nisë hetimi për nxjerrje të sekretit hetimor. Bëhet fjalë për mbledhjen e Këshillit të Mandateve dhe Imunitetit, ku prokurorë të krimeve të rënda paraqitën prova sekrete për dosjen Habilaj dhe dyshimet mbi implikimin e Saimir Tahirit.
Këto prova sekrete u bënë publike dhe u pasqyruan në disa media. Sipas deputetit të PD-së, kjo është shkelje e sekretit hetimor nga ana e kujtdo deputeti dhe duhet të hetohet.
“Prokuroria të marrë në hetim të gjithë persoat që kanë qenë në atë sallë”,
tha deputeti Alibeaj.
Ndërsa, deputeti i PS Ulsi Manja ishte i po të njëjtit mendim.
“Prokuroria ka gjithë mundësinë që të vazhdojë hetimet për nxjerrjen e sekretit hetimor”,
u shpreh Manja.
/tvklan.al
