Një dasmë në Nigeri është kthyer në një masakër pasi 18 të ftuar mbetën të vrarë. Sipas asaj që shkruajnë mediat ndërkombëtare, pjesëmarrësit u sulmuan nga disa persona me armë.
Ngjarja ndodhi mbrëmjen e së dielës. Autorët e kësaj ngjarje shkuan në vendin e ngjarjes me motorë dhe hapën zjarr duke lënë përveç viktima edhe 30 të lënduar.
“Autorët e armatosur vranë 18 persona në një dasmë dhe plagosën 30 të tjerë, shumica e tyre të rinj. 15 prej viktimave vdiqën në vend, ndërsa 3 të tjerë në spital”, tha Bege Katuka Ayuba, kreu administrativ i distriktit.
Nuk dihet se kush fshihet pas këtij sulmi, por bëhet e ditur se kjo zonë kohët e fundit ka qenë e përfshirë nga dhuna vdekjeprurëse mes barinjve myslimanë Fulani dhe fermerëve etnikë kristianë.
Zona e Kaduna-s, aty ku ndodhi ngjarja, është në përgjithësi e banuar nga njerëz të fesë kristiane. Prej kohësh aty ka pasur konflikte mes fermerëve dhe barinjve mbi të drejtat e kullotave dhe ujit.
Sa i përket ngjarjes së fundit, mësohet se disa fshatarë kanë humbur dhe forcat e sigurisë po i kërkojnë në zonë.
Një vit më parë qindra burra dhe djem të rinj u liruan nga një “shtëpi torturash” në një shkollë islamike ku mbaheshin të lidhur në zinxhirë, abuzoheshin seksualisht dhe kafshoheshin./tvklan.al
