Delegacioni i Bashkimit Europian në Tiranë dhe ambasadat e vendeve të BE-së, apelojnë për protestë paqësore. Përmes një njoftimi për mediat, delegacioni i BE kërkon që të shmangen aktet e dhunës në protestën e opozitës sonte në orën 19:00.
Sipas delegacionit të BE, edhe autoritetet ligjzbatuese duhet të tregojnë vetëpërmbajtje edhe nëse provokohen. Ndërsa apelojnë që palët politike të ulen në dialog si një çështje urgjente për të zgjidhur krizën.
Deklaratë e Delegacionit të Bashkimit Evropian:
Delegacioni i Bashkimit Evropian dhe Ambasadat e Shteteve Anëtare të Bashkimit Evropian në Shqipëri respektojnë plotësisht të drejtën themelore të qytetarëve të Shqipërisë për të demonstruar. Megjithatë, ne përsërisim rëndësinë e ushtrimit të kësaj të drejte në mënyrë paqësore.
Ne dënojmë aktet e dhunës që kanë ndodhur në protestat e mëparshme dhe u bëjmë thirrje udhëheqësve të protestës si dhe autoriteteve shqiptare që të sigurojnë që demonstrata e sotme të zhvillohet në mënyrë të rregullt dhe paqësore. Të gjitha palët e përfshira kanë përgjegjësinë për të garantuar sigurinë e atyre që janë në rrugët e Tiranës sonte. Nuk ka vend për dhunë në një protestë paqësore. Autoritetet e zbatimit të ligjit kanë përgjegjësinë për të vepruar me vetëpërmbajtje, edhe nëse provokohen.
Për të mirën e qytetarëve shqiptarë, shumica e të cilëve dëshiron të shohë që vendi të bëjë përpara me procesin e reformave dhe të ecë drejt anëtarësimit në Bashkimin Evropian, ne i bëjmë thirrje të gjitha palëve të mbështeten në ofertën ekzistuese për dialog me synimin për të gjetur një rrugëdalje nga situata aktuale politike si një çështje urgjente. /tvklan.al
