Kandidatët e Vetëvendosjes, vota minimale në 3 qarqe
Lëvizja Vetëvendosje dështoi në Shqipëri. Në zgjedhjet e 25 Prillit, partia e Albin Kurtit mori vetëm 3541 vota, nga mbi 1.66 milionë vota të hedhur gjithsej në mbarë vendin.
Tre kandidatët e saj që garuan si të pavarur në Tiranë, Gjirokastër e Lezhë kanë hyrë tashmë në listën e më pak të votuarve.
Kreshnik Merxhani në Gjirokastër mori vetëm 148 vota, Iljaz Shehu në Lezhë 400 dhe Bojken Abazi në Tiranë 2993 vota, përfshirë këtu edhe votën e vetë Kurtit.
Rezultati është provë e një dështimi të dyfishtë; jo vetëm i kandidatëve, por edhe personalisht i Albin Kurtit, i cili edhe pse mban postin e kryeministrit të Kosovës u pa në Shqipëri duke bërë fushatë elektorale për Vetëvendosjen së bashku me ministrat e qeverisë së tij, një lëvizje kjo e paprecedent që shkaktoi reagime të forta politike në Prishtinë.
Politika atje e akuzoi Kurtin se kishte braktisur vendin në mesin e pandemisë për të bërë fushatë në Shqipëri.
Si pjesë e fushatës elektorale u konsiderua në Kosovë edhe refuzimi që ai i bëri ofertës së kryeministrit Rama për të marrë vaksina nga Shqipëria, pasi e la vendin e tij pa vaksina vetëm për të mos i dhënë Ramës avantazh politik në mesin e fushatës.
E po ashtu, në inercinë e qëndrimeve për qëllime elektorale ishte edhe vonesa e tij në urimin për kryeministrin Rama për fitoren në zgjedhje.
Kryeministri grek Mitsotakis, Zaev i Maqedonisë së Veriut, presidenti turk Erdogan, presidenti francez Macron e të tjerë liderë rajonalë dhe europianë i përcollën urimet Ramës sapo doli rezultati, ndërsa urimi i Albin Kurtit erdhi disa ditë më pas, si të ishte urimi i sforcuar i një humbësi ndaj një fituesi dhe jo si ai i kryeministrit Kosovës për kryeministrin e Shqipërisë.
Tv Klan
