3 persona janë arrestuar nga Policia e Tiranës pasi gjatë protestës së zhvilluar të premten para Bashkisë së Tiranës hodhën lëndë piroteknike dhe goditën efektivët e policisë.

Protestuesit e prangosur sipas uniformave blu janë drejtuar nga përfaqësuesit e opozitës mes të cilëve Flamur Noka, Klevis Balliu dhe Tedi Blushi.

Dy nga këta të fundit janë vënë në hetim nga policia, së bashku me 2 persona të tjerë me dyshimin se kanë nxitur turmën e protestuesve drejt akteve të dhunshme.

8 protestues të tjerë janë shpallur në kërkim, pasi nga analizimi i veprimeve të tyre dhe pamjeve filmike kanë rezultuar se kanë përdorur mjete piroteknike apo janë konfrontuar me punonjësit e policisë.

Protesta e një dite më parë pati disa momente tensioni pasi disa prej pjesmarrësve tentuan të çanin kordonin e policisë për të hyrë brenda në godinë.

Veprimet e tyre u dënuan edhe nga përfaqësuesit ndërkombëtarë. Ambasadat e SHBA, BE, Britanisë së madhe, Italisë dhe OSBE-së e konsideruan sjelljen e protestuesve si të pajustifikueshme.


NE HETIM:

Klevis Balliu

Tedi Blushi

Dardan Bardhi

Enri Vrenozi

U ARRESTUAN:

Kevin Vidrica

Bernard Metaliaj

Franci Kaloshi


Në lidhje me protestën e organizuar ditën e djeshme, më datë 19.04.2024, në orën 11.00, përpara Bashkisë Tiranë, thirrur nga Aleanca për Teatrin, e cila filloi në orën 11.00 me fjalime dhe përgjithësisht e qetë, në momentin që ka marrë fjalën shtetasi B. K., në drejtim të portës hyrëse të Bashkisë Tiranë, janë hedhur sende të forta dhe lëndë piroteknike artizanale (molotov).

Pas kësaj një grup protestuesish, në drejtimin e shtetasve F. N., K. B., T. B., dhe të personave të tjerë, kanë tentuar të çajnë kordonin e Policisë, në portën tjetër të Bashkisë, nga krahu i sheshit “Skënderbej”, dhe gjatë këtij momenti ka patur konfrontim midis protestuesve dhe punonjësve të Policisë.

Pas përfundimit të protestës janë kryer veprimet procedurale, është këqyrur vendi i ngjarjes, ku janë sekuestruar në cilesinë e provës materiale objekte dhe sende të hedhura në drejtim të Bashkisë Tiranë, të cilat janë dërguar për ekspertime të mëtejshme kriminalistike.

Për përdorim të lëndëve piroteknike (molotov) janë arrestuar në flagracë shtetasit K. V., 18 vjeç, dhe B. M.,18 vjeç.

Gjithashtu po punohet për identifikimin dhe kapjen e dy shtetasve, të cilët kanë hedhur dhe kanë përdorur lëndë piroteknike (molotov).

Për ushtrim dhune ndaj punonjësve të Policisë është arrestuar shtetasi F. K., banues në Lushnjë.

Janë proceduar ne gjendje të lirë shtetasit K. B., T. B., E. V., D. B. Po punohet për kapjen e shtetasve A. T., R. D., A. M., J. H., B. Z., B. Gj., E. P., dhe A. P.

Gjithashtu janë administruar pamjet filmike të protestës dhe vijon këqyrja e pamjeve për identifikimin e personave të tjerë të përfshirë në veprimtari kriminale.

Materialet procedurale do i kalojnë Prokurorisë pranë Gjykatës së Shkallës së Parë të Juridiksionit të Përgjithshëm Tiranë për veprime të mëtejshme.


Tv Klan