Shenjtorja është një nga urat lidhëse të njohjes së shqiptarëve në botë

Kanë kaluar 5 vite nga shenjtërimi i Nënë Terezës nga Papa Françesku në vitin 2016. Shenjtorja Anjeze Gonxhe Bojaxhi e lindur në një familje shqiptare në Maqedoninë e Veriut u bë e njohur në mbarë botën për veprën e madhe të saj të bamirësisë në Indi për të cilën është vlerësuar edhe me çmimin Nobel.

Kryetari i Partisë Demokratike, Lulzim Basha ka reaguar me rastin e Ditës së Shenjtërimit të Nënë Terezës. Basha thotë se kjo është një krenarie kombëtare dhe reflektimi.

“Kremtimi i Shenjtërimit të Nënë Terezës është një ditë krenarie kombëtare dhe reflektimi. Mënyra më e mirë për ta nderuar Shën Terezën është shndërrimi i misionit të saj në misionin tonë, i shembullit të saj në frymëzim dhe nxitje për të bërë më shumë dhe me përulësi për ata që janë në nevojë e pa mbështetje, të braktisurit e të sëmurët, për të sjellë shpresë për një jetë më të mirë për gjithë të rinjtë dhe të rejat që si të vetmen zgjidhje shohin emigracionin, me besimin se edhe në ditët më të vështira, e mira triumfon gjithmonë mbi të keqen”, shkruan Basha.

Me këtë rast ka reaguar edhe kryeministri Edi Rama, i cili ka postuar një video në nder të Ditës së Shenjtërimit të Nënë Terezës./tvklan.al