Më 24 Korrik pritet që të paraqitet në Dhomat e Specializuara në Hagë edhe ish zëdhënësi i UÇK-së, Jakup Kransniqi.
Krasniqi, nuk ka treguar se në çfarë cilësie ka marrë ftesën nga Specialja.
“Megjithatë është fatkeqësi dhe ironi e llojit të vet, që në vend se Serbia të përballet me drejtësinë për krimet kundër njerëzimit dhe gjenocidit, ne duhet të mbrohemi nga akuzat e saj të trilluara”, ka shkruar Krasniqi në Facebook derisa ka konfirmuar se do të paraqitet në gjykatë.
“Përkundër bindjeve të mia sa i përket kësaj gjykate politike, të krijuar me presion politik nga njerëzit që bartin funksione të larta shtetërore në Kosovë dhe themelimin e saj me votën e atyre deputetëve që ishin numra në Kuvendin e Kosovës, unë do të prezantohem në hetuesinë e Gjykatës Speciale. Unë do të jem atje për të dhënë kontributin tim për ndriçimin e së vërtetës historike.”
I menjëhershëm ka qenë reagimi liderit të Nismës Socialdemokrate, Fatmir Limaj. Ai përmes një postimi në Facebook ka shkruar se Krasniqi edhe këtë herë do të dijë të mbrojë luftën e drejtë të UÇK-së.
Limaj tutje ka thënë se asnjë gjykatë nuk do të arrijë ta njollosë luftën e drejtë të Kosovës.
Pos Krasniqit në javën e ardhshme nga Specialja janë ftuar edhe Ramush Haradinaj, i cili menjëherë dha dorëheqje nga posti i kryeministrit, dhe këshilltari i Presidentit Bislim Zyrapi.
Kreu i LVV-së, Albin Kurti tha se Kosova po vuan pasojat e votimit të Gjykatës Speciale nga ata që morën vendime të liga e kishin qëndrime të gabuara
Ndërsa në reagimin e zëvendëskryetarit të PDK-së, Enver Hoxhaj, përmendet vetëm Jakup Krasniqi e Bislim Zyrapi, jo edhe Ramush Haradinaj, i cili u ftua në të njëjtën kohë me këta dy të parët.
Tv Klan
