Efektivi plagos me armën e shërbimit 70-vjeçarin
Një ngjarje e rëndë ka ndodhur në orët e para të mëngjesit të kësaj të enjteje, ku një efektiv policie ka plagosur me armë zjarri një 70-vjeçar në oborrin e shtëpisë së tij, në lagjen “Sheq i Madh” të Fierit.
Polici Paulin Shpani, 41-vjeç, në gjendje të dehur ka humbur kontrollin e automjetit të tij duke dalë nga rruga dhe siç duket nga pamjet ka përfunduar në oborrin shtëpisë së 70-vjeçarit Solli Meço. Pasi ka debatuar me të zotin e shtëpisë, efektivi i policisë ka nxjerrë armën, duke e plagosur lehtë. Bashkëshortja e 70-vjeçarit tregon se çfarë ka ndodhur.
Sipas saj, kjo nuk është hera e parë që një makinë përfundon në oborrin e shtëpisë së tyre duke shkaktuar dëme materiale, por deri tani nuk është marrë asnjë masë.
Në vendin e ngjarjes kanë shkuar forca të shumta policie, ndërsa Paulin Shpani është shoqëruar në Drejtorinë Vendore të Policisë. Edhe Shërbimi për Çështje të Brendshme dhe Ankesa po e heton atë që ka ndodhur për të nxjerrë përgjegjësitë e efektivit të policisë.
Tv Klan
